Friday, April 23

वितरक र हलवालाले अझै पैसा दिएका छैनन् भन्न पनि लाज भइसक्यो: ‘छ माया छपक्कै’ निर्माता

July 26, 2020 119

काठमाडौं – गतवर्षको दशैंमा रिलिज भएर १८ करोड ग्रस कलेक्सन गरेको फिल्म ‘छ माया छपक्कै’ का निर्माताले वितरक र हलवालाले अझैसम्म पनि दिनुपर्ने शेयर नदिएको बताएका छन् ।

निर्माता रोहित अधिकारीले सामाजिक सञ्जालमार्फत फेसबूकमार्फत वितरक र हलवालाले अझैसम्म पनि शेयरबाट पाउनुपर्ने रकम नदिएको बताएका हुन् ।

‘असोज २०७६ मा नगदमा चलाएको हाम्रो चलचित्रको पैसा आझै पाएका छैनौं, वितरक र हलवालहरुले अझै दिएका छैनन् भन्न पनि लाज भइसक्यो,’ निर्माता अधिकारीले भने ।

उनले निर्मातालाई वितरक र हलवालाले शोषण गरेको आरोप लगाएका छन् । यसअघि पनि उनले हलवालाले फिल्म चलाएर पैसा नदिएको बताउँदै आएका थिए ।

‘वितरकलाई कमिसनको मात्र मतलब हो ?,’ उनले प्रश्न गरे ।

निर्माता अधिकारीका अनुसार वितरक र हलवालाले कोरोनाको कारण देखाएर पैसा दिएका छैनन् । जबकि, दशैंका बेला कोरोनाले कुनै फिल्मलाई पनि प्रभावित गरेको थिएन ।

उनले देशभरबाट २ करोडभन्दा बढी रकम लिन बाँकी रहेको समेत बताए । राजधानीका मल्टिप्लेक्स र सिंगल हलले पनि माघसम्म बुझाउनुपर्ने पारिश्रमिक अझै बुझाएका छैनन् ।

नाफा कमाइ गरेको फिल्मले पनि १० महिनासम्म पनि रकम नदिएको विषयमा फिल्मका निर्देशक दीपेन्द्र लामाले निर्माता अधिकारीलाई चलचित्र कलाकार संघमा निवेदन दिन सुझाव दिएका छन् ।

उनले भनेका छन्, ‘नेपाल चलचित्र संघमा निवेदन दिनुस् । त्यहाँ पनि भएन भने कानुनी उपचारमा जानुस् । दर्शकसँग हाकाहाकी पैसा लिने अनि निर्मातालाई महिनौं झुलाउने भन्ने हुन्छ र ?’

 

प्रतिकृया दिनुहोस्