Thursday, April 15

लिदी पहिरो : मृतक ११ को पहिचान, बस्ती स्थानान्तरण गरिने

August 15, 2020 255

काठमाडौँ – सिन्धुपाल्चोकको जुगल गाउँपालिका -२, लिदीको पहिरोमा मृत्यु भएका ११ जनाको पहिचान भएको प्रहरीले जनाएको छ ।

जिल्ला प्रहरी कार्यालय सिन्धुपाल्चोकका अनुसार टीकामाया दोङ, छिरिङ दोङ, जिताई झाक्री, मिलन दोङ र सानु दोङ, जयबहादुर दोङ, दावा ल्हामु दोङ, तारल्हमो दोङ, पिर्ती दोङ, धनमाया दोङ र रिमेक्स दोङको शव पहिचान भएको छ ।

 

लामाटोलमा शुक्रबार बिहान साढे ६ तिर गएको पहिरोमा अझै २७ जना बेपत्ता भएका छन् । उनीहरुको आज बिहानबाट फेरि खोजी शुरू भएको प्रहरीले जनाएको छ ।

बस्ती स्थानान्तरण गरिने

यसैबीच गृहमन्त्री रामबहादुर थापाले लिदीको बस्ती स्थानान्तरण गरी उचित स्थानमा बासस्थानको व्यवस्था मिलाउने बताएका छन् ।

पहिरोग्रस्त क्षेत्रमा शुक्रबार पुगेर स्थलगत अनुगमनपछि उनले बस्ती स्थानान्तरण गरिने बताएका हुन् ।

शुक्रबार बिहान खसेको पहिरोमा परेर त्यहाँ ११ जनाको मृत्यु भएको छ भने २७ बेपत्ता छन् ।

मन्त्री थापाले अझै ठूलो क्षति हुन सक्ने अवस्था देखिए पनि पूर्वसावधानी अपनाउँदा कम क्षति भएको बताए । सरकारको तर्फबाट उद्धारलाई छिटोभन्दा छिटो अघि बढाउने र पुनःनिर्माणको काम तीब्र बनाउने गृहमन्त्री थापाको भनाइ थियो ।

शुक्रबार गृहमन्त्री थापा राहत सामग्रीसहित घटनास्थलमा पुगेका थिए । उनले लिदी गाउँ जोखिमयुक्त ठाउँमा रहेको निश्कर्षका आधारमा स्थानीय प्रशासनले सचेतना अपनाउन आग्रह गरे पनि क्षति भएको भन्दै दुःख व्यक्त गरे ।

 

 

 

प्रतिकृया दिनुहोस्