Friday, April 23

१० जनाको शव फेला, ४१ बेपत्ता खराब मौसमले घटनास्थल गएको गृहमन्त्रीसहितको टोली फर्कियो

September 3, 2020 251

बागलुङ- बागलुङको ढोरपाटन नगरपालिकामा बुधबार राति गएको बाढीपहिरोमा बेपत्ता भएकामध्ये अहिलेसम्म १० जनाको शव फेला परेको छ ।

नगरपालिकाको ७, ८ र ९ वडाको तटीय वस्तीमा भूजी खोलाको बाढी पस्दा ४१ जना बेपत्ता भएको जिल्ला प्रहरी कार्यालय बागलुङले जनाएको छ । बेपत्ताको सङ्ख्या अझ बढ्न सक्ने अनुमान प्रहरीको छ ।

घटनास्थलमा फेला परेको शवको पहिचान हुन नसकेको जिल्ला प्रहरी कार्यालय बागलुङका प्रहरी नायव उपरिक्षक तथा सूचना अधिकारी राजेन्द्र रेग्मीले जानकारी दिए । बाढीले ३१ घरमा पूर्ण क्षति पुर्‍याएको छ । उनले भने, ‘हालसम्म ४१ जना बेपत्ता भएको सूचना स्थानीयवासीबाट प्रहरीलाई प्राप्त भएको छ ।’

घटना स्थलमा नेपाल प्रहरी र नेपाली सेनाले उद्दार गरिरहेको छ । घटनामा हालसम्म चार जना घाइते भएको प्रहरीको भनाइ छ । अरिवरल वर्षासंगै गएराति १२ बजेको समयमा आएको बाढीले बस्तीका घर बगाएको घटनास्थलमा रहनुभएका इलाका प्रहरी कार्यालय बुर्तिवाङका प्रमुख प्रहरी निरीक्षक प्रकाशसिंह भण्डारीले जानकारी दिए ।

प्रहरीका अनुसार बाढीका कारण घाइते हुनेमा ढोरपाटन न.पा.४ दुनेपोखराका १५ वर्षीय महेन्द्र पुन, २८ वर्षीया सरीता घर्ती, ४२ वर्षीय धर्मेन्द्र पुन र ५४ वर्षीया बेलमती पुन रहेका छन् ।

गृहमन्त्रीको टोली खराव मौसमले पोखरा फर्कियो

बागलुङको ढोरपाटन नगरपालिका ८ र ९ मा गएको पहिरोमा परी ज्यान गुमाएका ब्यक्तिको बारेमा तथा त्यहांको बस्तुस्थिति बुझ्न गएको गृह मन्त्री रामबहादुर थापा सहितको टोली खराव मौसमका कारण घटनास्थल पुग्न नसकेपछि पोखरा फर्किएको छ ।

सो क्षेत्रमा गएराति गएको भीषण पहिरोमा परी हराइरहेका १० जनाको शव फेला परेको छ भने ४१ भन्दा बढी ब्यक्ति अझै हराइरहेका छन ।

खोजी तथा उद्धारको लागि अहिले नेपाली सेना, सशस्त्र प्रहरी बल र नेपाल प्रहरीको टोली खटिएको छ ।

पोखरामा रहेका गृहमन्त्रीसहितको टोली मौसम खुल्नासाथ घटनास्थल जाने तयारीमा रहेको गृहमन्त्रीका प्रेस सल्लाहकार किरण भट्टराईले जानकारी दिए ।

प्रतिकृया दिनुहोस्