Thursday, May 13

कोरोना जितेका प्रहरीको अनुभव : नआत्तिनुस् कोरोना लाग्दैमा मरिँदैन

September 8, 2020 348

काठमाडौँ– मुलुकभर तीव्ररूपमा कोरोना भाइरस (कोभिड-१९) संक्रमितको संख्या बढ्दै जाँदा ड्युटीमा खटिएका प्रहरीमा पनि भुसको आगो जसरी संक्रमण फैलन थालेको छ ।

सडकमा खटिनेदेखि प्रधान कार्यालयमा कार्यरत प्रहरीसम्ममा संक्रमण भइसकेको छ । जवानदेखि प्रहरी नायव महानिरीक्षक (डीआइजी) सम्म कोरोना संक्रमित भएका छन् ।

 

यो सामाग्री पार्दासम्म नेपाल प्रहरीमा देशभर २ हजार १६१ जनामा कोरोना भाइरस संक्रमण भइसकेको छ । यीमध्ये ९५० जना उपचारपछि निको भएर फर्किसकेका छन् ।

संक्रमणबाट नआत्तिन कोरोना जितेका प्रहरीको सुझाव

भनिरहनु पर्दैन कोरोना भाइरसको महामारीले भयावह रूप लिएको खबर सार्वजनिक हुन थालेसँगै अहिले आम मानिस त्रासमा छन् । सर्वसाधारणमा त्रास फैलिरहँदा कोरोना जितेकाहरूले कोरोनासँग डराउनु पर्ने अवस्था नहरेको र मनोबल उच्च पार्दा सहजै जित्न सकिने अनुभव सुनाउँछन् ।

महानगरीय प्रहरी वृत्त बालाजुमा कार्यरत छन्, प्रहरी निरीक्षक (इन्स्पेक्टर) गम्भीरजङ्ग थापा । गत चैत ११ गते मुलुकमा लकडाउन सुरु भएसँगै अहोरात्र ड्यूटीमा खटिएका उनमा असार २६ गते कोरोना पोजेटिभ देखियो ।

उनीसँगै कार्यरत एक प्रहरी सहायक निरीक्षकमा संक्रमण देखिएपछि कन्ट्याक ट्रेसिङका आधारमा परीक्षण हुँदा उनमा पनि पोजेटिभ देखिएको थियो ।

कोरोना पाजेटिभ देखिएकै दिन उनलाई बलम्बुस्थित सशस्त्र प्रहरी बलको अस्पतालमा भर्ना गरेर त्यहीँ उपचारको चाँजोपाँझो मिलाइयो ।

प्रहरी निरीक्षक थापा खबरहबसँग भन्छन्, ‘मलाई असार २६ गते कोरोना भाइरस संक्रमण भयो । मसँगै कार्यरत एक प्रहरी सहायक निरीक्षकमा कोरोना संक्रमण पुष्टि भएपछि हामी पनि कन्ट्याक ट्रेसिङमा पर्‍यौँ । म पनि संक्रमित भएको रहेछु ।’

संक्रमणको खबर पाउँदा थापा फिल्डकै ड्युटीमा थिए । आत्महत्याको एउटा केशमा मुचल्का गर्न पुगेका उनी आफू संक्रमित भएको खबर पाउनसाथ फर्किएर त्यही दिन बेलुका बलम्बुस्थित सशस्त्र प्रहरीको अस्पतालमा भर्ना भए ।

उनले भने, ‘संक्रमण देखिएसँगै म बलम्बबुमा ९ दिन आइसोलेसनमा बसेँ । कोरोनालाई जितेर एकहप्ता थप घरमै क्वारेन्टाइन बसेर अहिले ड्यूटीमा फर्किएको छु । मलाई अहिले कुनै समस्या छैन ।’

उनमा कोरोनाको कुनै लक्षण देखिएन । उनी अहिले पहिलेकै आत्मविश्वास स्फूर्तिसहित ड्यूटी छन् । कोरोना बारे बाहिर सुनिने हल्ला जस्तो छैन उनको अनुभव ।

संक्रमणमा पर्दा प्रहरी सङ्गठनभित्रकै उच्च अधिकारी तथा सहकर्मीहरूको हौसला र सद्भावका कारण आफूले छोटो समयमै कोरोनालाई जितेको अनुभव प्रहरी निरीक्षक थापाको छ ।

कोरोनाको जोखिमलाई ध्यानमा राखेर सरकारले गरेको लकडाउनबीच प्रहरी कर्मचारीहरू अत्यावश्यकीय प्रयोजनमा चल्ने सवारी व्यवस्थापन र मानिसहरूको रेखदेखमा बढी केन्द्रित भए । नागरिकहरूसँग प्रत्यक्ष सम्पर्कमा रहुनुपर्ने भएकाले संक्रमणको जोखिम उच्च थियो ।

यही अवस्थामा संक्रमित बने महानगरीय ट्राफिक प्रहरी कार्यालयमा कार्यरत प्रहरी सहायक निरीक्षक अनमोल पाण्डे । उनी भन्छन्, ‘नागरिकसँग प्रत्यक्ष सम्पर्कमा रहुनुपर्ने भएकाले म कतिबेला कहाँ संक्रमित भए पत्तो पाइएन । जोखिमको केन्द्र भागमा हामी थियौँ भन्ने मैले पहिले नै बुझिसकेको थिएँ । मैले पहिले नै आत्मबल बलियो बनाएको थिएँ । यसले मलाई कोरोना भाइरस जित्न धेरै मद्दत गरेको महसुस भएको छ ।

पाण्डे आइसोलेसनमा रहँदा कार्यालय प्रमुख तथा आफ्ना वरिष्ठ अधिकारीहरूले देखाएको सद्भावले सहज भएको अनुभव सुनाउँछन् । उनी भन्छन्, ‘कोरोना भएर मरिन्छ भन्ने हुँदैन । आत्मबल बलियो बनायो भने डराउनुपर्ने अवस्था आउँदैन ।’

नेपालमा अधिकांश संक्रमितलाई कोरोनाको लक्षण देखिएको छैन । पाण्डेलाई लक्षण देखियो । उनले भने, ‘मलाई केहीमात्रामा कोरोनाको लक्षण देखियो । हल्का फ्लुजस्तो लक्षण पाँचौँ दिनसम्म देखिएको थियो । ज्वरो आउने, छाती दुख्ने समस्या भए पनि खासै अप्ठेरो महसुस भएन ।’

प्रहरी प्रधान कार्यालयका प्रवक्ता एसएसपी कुवेर कडायतका अनुसार देशभरका संक्रमित प्रहरीको अवस्थालाई विशेष ध्यान दिएर हेरिएको छ । उनले भने, ‘संक्रमित प्रहरीहरूको निरन्तर सम्पर्कमा हामी छौँ । महानिरीक्षकज्यू पनि निरन्तर सम्पर्कमा हुनुहन्छ ।’

संक्रमितहरूलाई सबैभन्दा धेरै आत्मविश्वास र ऊर्जाको आवश्यकता पर्छ । सङ्गठनभित्रका उच्च अधिकारी, सहकर्मी र परिवारबाट पाएको माया र हौसलाले प्राण घातक रोगको कुनै ओखतीभन्दा बढी प्रभावकारी काम गरेको उनीहरूको अनुभव छ ।

नेपाल प्रहरीभित्र फिल्डमै खटिएर काम गर्ने कर्मचारीलाई सरकारले पर्याप्त स्वास्थ्य सुरक्षा सामग्री उपलब्ध गराउन सकेको छैन । तैपनि, उनीहरू जिम्मेवारीलाई केन्द्रमा राखेर डटिरहेका छन् । यतिबैला प्रहरीलाई सबैभन्दा धेरै नागरिक सहयोगको आवश्यकता छ ।

 

 

 

प्रतिकृया दिनुहोस्