Wednesday, April 21

प्रहरी र स्वास्थ्यकर्मीमा कोरोना पुष्टि भएपछि जिप्रका र अस्पताल बन्द

July 23, 2020 239

साउन ८, २०७७ स्याङ्जा : कोरोना महामारी नियन्त्रण र रोकथाम गर्न खटिएका तीन जना प्रहरीलाई नै संक्रमण भएपछि जिल्ला प्रहरी कार्यालय प्रवेशमा रोक लगाइएको छ। सुरक्षाकर्मी र स्वास्थ्यकर्मीमा सङ्क्रमण पुष्टि भएसँगै सेवाग्राहीलाई सतर्क रहन आग्रह गरिएको छ। मंगलबार जिल्ला प्रहरी कार्यालय स्याङ्जाका ३ जना सुरक्षाकर्मीमा कोरोना संक्रमण पुष्टि भएको थियो। सङ्क्रमित सुरक्षाकर्मीलाई करेण्डाँडास्थित आइसोलेसनमा राखिएको छ। जिल्ला प्रहरी कार्यालय स्याङ्जाले अर्को सूचना जारी नभएसम्मका सेवाग्राहीलाई कार्यालय प्रवेशमा रोक लगाएको हो। सेवाग्राहीले निवेदन वा जाहेरी दिनु परेमा जिल्ला विद्युतीय माध्यम प्रयोग गर्न आग्रह गरिएको प्रहरी नायब उपरीक्षक राजेन्द्र अधिकारीले जानकारी दिए। जनताको गुनासो र सेवामा आफूहरु तत्पर रहेको बताउँदै अधिकारीले भने, ‘कार्यालयभित्रका प्रहरीलाई बाहिर जान र सेवाग्राहीलाई भित्र प्रवेश गर्नमा रोक लगाएका छौँ, हाम्रो कार्यालयसँग सम्बन्धित कुनै काम परे सेवाग्राहीहरूले १०० डायल गर्न र इमेल/इन्टरनेटको प्रयोग गर्न सक्नुहुनेछ।’ विभिन्न संघ-संस्थालाई पनि जिमेलमार्फत पत्राचार गर्न आग्रह गरिएको अधिकारीले जानकारी दिए। गल्याङ नगरपालिकास्थित गल्याङ नगर अस्पतालको स्वास्थ्यकर्मीमा समेत कोरोना सङ्क्रमण देखिएपछि अस्पतालबाट प्रदान भैरहेको सेवा प्रवाह बन्द गरिएको छ। हालसम्म स्याङ्जामा २०४ जना सङ्क्रमित भेटिएकामा १८ जना आइसोलेसनमा छन् दुई जनाको मृत्यु भएको छ। बाँकी १८४ जनाले कोरोनालाई जितेर घर फर्केका छन्।

प्रतिकृया दिनुहोस्